Papas millas

E determinei entre min enveliñar  a miña irmá, indo a Audierne de visita, a buscar un descanso. Galván, o menciñeiro, deume por unha libra de ouro catro graus do veneno que chaman “tanatos umbrae”, preparados para esleir en papas de millo, que era o almorzo máis gustoso de Ana Eloisa.

As cronicas do sochantre

Falamos de papas noutras páxinas, e chégalle a quenda ás de millo, que segundo Cunqueiro serviron de vehículo para a morte de Ana Eloísa, irmá de madame de Saint Vaast. Por culpa de tal crime vagaba por Bretaña na hoste que acompaña na novela ao sochantre de Pontivy.

Receitas de papas

As receitas de papas aparecen nalgúns libros clásicos de cociña, como os de Pardo Bazán, e non están presentes noutros, coma o Picadillo. Tamén as podemos atopar en obras máis recentes, da segunda metade do século XX, coma os de Cipriano Torre Enciso ou de Araceli Filgueira, e noutros de séculos pasados, como é o libro de guisados de Ruperto de Nola.

Araceli Filgueira, en La Cocina Gallega, o libro que xunta o texto de A Cociña Galega de Cunqueiro cun receitario desta autora e un estudio bibliográfico de Antonio Odriozola, propón a seguinte receita de papas de millo.

Ingredientes.

1 litro de auga

12 culleradas de fariña de millo

1 pataca grande

1 vaso de leite

sal

Preparación

Pelase a pataca e pártese como para tortilla. Nunha cazola ponse a fariña de millo e váiselle incorporando a auga fría, despois bótanselle as patacas e ponse a cocer movendo constantemente ata que estea completamente cocida a pataca e se formara unha pasta. Incorporase o leite sen deixar de remover e sazonase con sal. Sérvense moi quentes, podéndose alixeirar con algo de auga ou leite quentes se espesan máis da conta.

Na mesma obra Araceli Filgueira propón unha segunda receita de papas de rixóns que se preparan na mesma pota en que se fixeron os roxóns e empregando algo da graxa restante. Engádese fariña milla, auga e sal e cócese ata que espesen.

Once anos antes da publicación do libro de Araceli Filgueira aparecía Cocina gallega “enxebre” de Cipriano Torre Enciso, que inclúe a receita das papas millas, feitas de fariña milla cocida con auga e sal ata espesar. E sobre a maneira de comelas, di Torre Enciso “Se sirven en platos poco hondos y, caliente o fría, a gusto del comensal. Se pone en la mesa una jarra de leche y un azucarero con azúcar molido. El comensal debe hacer un hoyo en las papas, sobre el plato, y, en dicho hoyo, debe echar la leche y el azúcar.”.


Deixa unha resposta